Vuçiq: Armët do t’u shpërndaheshin banorëve serbë të Kosovës për të rezistuar

Presidenti i Serbisë Aleksandar Vuçiq konfirmoi se shërbimet serbe po rindërtojnë atë që ndodhi më 24 shtator në Banjskë, kur një grup terroristësh të uniformuar u përplas me policinë e Kosovës, duke vrarë një polic.

Duke folur për mënyrën se si filloi gjithçka, Vuçiq tha se një grup serbësh fillimisht vendosën dy kamionë nëpër urë, pra një barrikadë, por edhe se dyshohet se mes tyre ishin vendosur eksplozivë.

Presidenti serb për herë të parë deklaroi se një pjesë të armëve do t’u shperndaheshin disa banorëve, në mënyrë që ata t’i rezistonin terrorit të cilin ai vazhdimisht pretendon se po ia bën qeveria e Kosovës serbëve që jetojnë në Kosovë.

“Nuk mendoj se është planifikuar asgjë për atë mbrëmje, as të nesërmen, as të pasnesërmen”, ka thënë Vuçiq.

Ai thekson se pas vendosjes së barrikadave është urdhëruar largimi i tyre nga Policia.

“Ata hasën në eksploziv që hodhën në erë dy policë, njëri prej të cilëve u plagos dhe tjetri u vra. Më pas mendoj se i treti hapi zjarr dhe e qëlluan edhe atë, sepse ishin afër dhe nuk mund të shpëtonin nga kamioni, dhe kështu filloi gjithçka”, tha Vuçiq, duke përsëritur edhe një herë se vrasja e policit nuk ishte e planifikuar.

Ai vazhdon ta mohojë se polici i Kosovës është vrarë me armë zjarri.

“Është marrëzi që një polic është vrarë nga 300 metra larg. Atë e bëjnë sepse kanë llogaritur se Radoiçiç nuk ka mundur ta eliminojë, pra kanë llogaritur se duhet të jetë 300 metra, sepse ai ka qenë diku 300 metra larg. Këto janë lojërat e tyre”, tha Vuçiq.