Tik-tak, tik-tak… Vetëm pak orë larg liberalizimit të vizave
Parlamenti Evropian të martën e voton tekstin për të cilin janë marrë vesh vendet e BE-së që edhe kosovarët të udhëtojnë pa viza në zonën Schengen. Kjo vjen pas vendimit të 9 marsit kur Këshilli Evropian mekanizëm-vendim marrës I Bashkimit Evropian, për herë të parë votoi heqjen e regjimit të vizave për kosovarët.
Sipas njoftimit nga PE-ja, sapo në seancë plenare të martën miratohet liberalizimi, akti formalisht të mërkurën, bëhet ligj që nënshkruhet nga presidentja e PE-së dhe përfaqësuesi i Suedisë që mban presidencën e BE-së deri më 30 qershor.
20 ditë më vonë, vendimi hyn në fuqi me shpalljen në gazetë zyrtare.
Në ceremoni do të marrin pjesë edhe presidentja e Parlamentit Evropian, një përfaqësues i presidencës suedeze të Këshillit të Bashkimit Evropian, dhe ka gjasë që të merr pjesë edhe zëvendëskryeministri i Kosovës, Besnik Bislimi në konferencë për shtyp, jo në ceremoninë e nënshkrimit.
Parlamenti Evropian disa herë që nga viti 2016 ka votuar në favor të lëvizjes së lirë të kosovarëve në Zonën Schengen.
Procesi bisedues mes Prishtinës zyrtare dhe Brukselit për heqjen e regjimit të vizave nisi në janar 2012.
Kosova ka plotësuar 95 kritere që ishin gati dyfishi që ju kërkua vendeve tjera të Ballkanit Perëndimor, që e kanë liberalizimin për më tepër se një dekadë.
