“Shihemi na…”/ I riu në Pejë revoltohet për gjobën në trafik, kërcënon zyrtarët policorë
Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpesh herë pakënaqësitë e tyre kalojnë në kërcënime, duke ua vështirësuar kështu punën e madje duke ua kërcënuar edhe jetën, raporton Gazeta Sinjali.
E pakënaqësitë për gjobat e shqiptuara në trafik janë një ndër arsyet kryesore që shtyjnë qytetarët të bëjnë veprime agresive ndaj zyrtarëve policorë. Një rast i tillë ka ndodhur paraditen e sotme në rrugën ‘Eliot Engel’ në Pejë.
Sinjali mëson se zyrtarët policorë që po patrullonin në atë zonë kanë shqiptuar një tiketë për kundërvajtje në trafik ndaj 30-vjeçarit, i cili në shenjë revolte ka bërë veprime agresive duke goditur me shqelm veturën e Policisë.
Kjo ka bërë që i dyshuari të arrestohet dhe të shoqërohet në stacion policor, ku ka vazhduar me kërcënime ndaj policëve që e gjobitën, duke u thënë se do shihen pasi të dalin nga stacioni.
Si rezultat i kësaj, Prokurori i shtetit ka urdhëruar që ndaj 30-vjeçarit të caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Kanosje ndaj personit zyrtar’.
