Rast i rëndë në familjen Lani: Ky është burri 58-vjeçar që vdiq dje, u gjet i shtrirë në tokë në fshatin Poterq i Epërm të Klinës
Një ngjarje e rëndë ka ndodhur të premten në familjen Lami në fshatin Poterq i Epërm në Klinë, ku një burrë 58-vjeçar është gjetur pa shenja jete. Policia tashmë ka nisur hetimet për vdekjen e tij, ndërkohë që trupi i pajetë është dërguar për obduksion, raporton Gazeta Sinjali.
Burimet e Gazetës Sinjali brenda Emergjencës kanë bërë me dije se bëhet fjalë për Selim Lanin, vdekjen e të cilit e ka konfirmuar ekipi mjekësor pasi viktima u dërgua fillimisht në Spitalin Rajonal të Pejës.
Pas ekzaminimeve për shenjat vitale, mjeku ka konstatuar se i moshuari ka ndërruar jetë.
Lidhur me rastin është njoftuar edhe Policia e Kosovës, të cilët kanë dalë në vendin e ngjarjes për të kryer ekzaminimet e nevojshme që ndihmojnë në zbardhjen e rrethanave të rastit.
Në kuadër të veprimeve hetimore është marrë deklarata e një fqinji të të ndjerit, i cili ka deklaruar se e ka gjetur të ndjerin të shtrirë në tokë, teksa po kthehej në shtëpi.
Me urdhër të prokurorit, rasti është cilësuar ‘Hetim i vdekjes’ dhe trupi i pajetë i viktimës është dërguar në Institutin e Mjekësisë Ligjore për obduksion.
Edhe nga Policia Rajonale në Pejë e kanë konfirmuar rastin.
“Raportohet se viktima mashkull kosovar është hasur i shtrirë në rrugë, njësitë policore dhe një ekipe e ndihmës së shpejtë kanë dalur në vendin e ngjarjes, viktimës iu është dhënë ndihma e parë pastaj është dërguar në spitalin rajonal të Pejës. Mjeku përgjegjës në spitalin e Pejës ka konstatuar se viktima ka ndërruar jetë. Në lidhje me rastin është konsultuar prokurori i shtetit me urdhër të së cilit trupi i pa jetë i viktimës është dërguar në IML për obduksion, rasti vazhdon të hetohet.”, ka njoftuar Policia.
