Osmani: Situata në Veri eskalon për shkak të bandave kriminale që përkrahen nga Vuçiqi
Presidentja e Republikës së Kosovës, Vjosa Osmani, ka folur për situatën në veri të vendit dhe tensionet që krijohen herë pas here atje.
Në një konferencë për media pas Samitit të Bashkimit Evropian për Ballkanin Perëndimor, Osmani ka thënë se situata në veri eskalon për shkak të bandave kriminale që sipas saj, përkrahen nga presidenti i Serbisë, Aleksandar Vuçiq.
“Sikurse në shumë raste paraprake, situata në veri eskalon, sepse bandat kriminale të përkrahura nga Vuçiq kanë për qëllim eskalim të situatës dhe destabilizim të Ballkanit Perëndimor. Duhet të bëjmë çmos që përmes institucioneve të sigurisë të vendosim rend dhe ligj, por edhe të mbrojmë jetën e secilit qytetar”, ka thënë ajo.
Për ngjarjet e sotme në veri Osmani ka thënë se janë informuar gjatë ditës përmes raporteve të institucioneve përkatëse dhe ka shtuar se po presin në fund të ditës raportin përfundimtar.
Osmani ka thënë se në samitin e sotëm BE-Ballkanik Perëndimor nuk është diskutuar përmbajtja e versionit të ri planit franko-gjerman për dialogun Kosovë-Serbi.
Për versionin e ri i cili i është dorëzuar sot kryeministrit Albin Kurti, Osmani ka thënë se do të ketë takim ndërinstituciona në Kosovë dhe do të koordinohen qëndrimet rreth tij.
“Versioni është dorëzuar sot, megjithatë nuk është diskutuar përmbajtja e versionit të ri në takime, është diskutuar parimi si i tillë. Do të kemi një takim tjetër ndërinstitucional për t’i koordinuar qëndrimet sa i përket versionit të ri. Do t’i ndajmë sapo t’i kemi të gatshme”, ka thënë Osmani.
