Ky është i arrestuari për bixhoz të paligjshëm në Skenderaj, bastiset lokali i tij
Aktivitetet e organizimit të skemave piramidale dhe bixhozit në vendin tonë janë të ndaluara me ligj dhe përbëjnë vepër penale, por kjo nuk po i ndalon qytetarët që të veprojnë kundërligjshëm, të cilët po sfidojnë kështu shtetin, raporton Gazeta Sinjali.
Policia e Kosovës ka arrestuar mbrëmë në Skenderaj një person, pasi i njëjti dyshohet se në lokalin e tij zhvillonte veprimtarinë e kundërligjshme të lojërave të fatit.
Burimet brenda Prokurorisë kanë bërë me dije se personi që u arrestua është Gëzim Rrustemi, i cili tashmë ndodhet nën masën e ndalimit policor.
Pas kontrollit policor, në cilësi të provave materiale janë gjetur dhe sekuestruar, shtatë aparate të lojërave, dy televizorë dhe dëshmi tjera relevante.
I dyshuari është shoqëruar në stacion policor dhe është intervistuar nga organet e hetuesisë.
Me urdhër të prokurorit, ndaj të dyshuarit është caktuar masa e ndalimit policor dhe i njëjti do të hetohet nën dyshimet për kryerjen e veprës penale ‘Organizim i skemave piramidale dhe bixhozit të paligjshëm’.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
