Konflikt mes çiftit në Ferizaj, i riu e bën për spital të fejuarën – vet përfundon në ndalim policor

Numri i rasteve të dhunës në vendin tonë është në rritje çdo ditë e më shumë. Çdo ditë gra që përjetojnë dhunë nga familjarët e tyre, kryesisht nga partnerë, kërkojnë ndihmën e Policisë për të marrë mbrojtje dhe për të zgjidhur problemet, raporton Gazeta Sinjali.

Në Polici kanë përfunduar dje edhe një çift nga Ferizaj, pasi dyshohet se burri ka sulmuar fizikisht të fejuarën e tij.

Burimet e Gazetës Sinjali brenda Prokurorisë kanë zbardhur detaje nga deklarata e viktimës, e cila ka thënë se gjithçka ka ndodhur pas një konflikti verbal, e që më pas i dyshuari e ka sulmuar fizikisht.

Si pasojë e dhunës, 23-vjeçarja ka marrë lëndime trupore dhe ka kërkuar ndihmë mjekësore në spital.

Ndërkohë i dyshuari është arrestuar dhe është shoqëruar në stacion policor ku është përballur me denoncimin ndaj tij.

Me urdhër të Prokurorit të Shtetit, ndaj tij është caktuar masa e ndalimit policor dhe i njëjti do të hetohet për veprën penale ‘Dhunë në familje’.