E trishtë: Dy persona dhunojnë seksualisht një vajzë të mitur, e kërcënojnë se do t’ia publikojnë fotot intime

Numri i rasteve të ngacmimeve, sulmeve e dhunës seksuale në vendin tonë ka marrë përmasa shqetësuese. Në shumë prej tyre, viktima janë vajzat e shpesh të dyshuar, janë persona të njohur të tyre të cilët përkundër moshës minorene të viktimave, krijojnë raporte intime me to dhe i keqpërdorin seksualisht, raporton Gazeta Sinjali.

Një ngjarje e trishtë ka ndodhur dy muaj më parë në Prishtinë, mirëpo është denoncuar vetëm para pak ditësh.

Burimet e Gazetës Sinjali brenda Prokurorisë kanë bërë me dije se e mitura ka ngurruar ta denoncojë tmerrin që i ka ndodhur për shkak të kërcënimeve që ka marrë nga të dyshuarit, se do t’ia publikojnë fotografitë intime të cilat cenojnë integritetin dhe privatësinë e saj.

Në kuadër të veprimeve hetimore, vajza është dërguar për ekzaminime mjekësore në Institutin e Mjekësisë Ligjore, teksa dje është arritur që të identifikohen dy personat e dyshuar të cilët janë po ashtu të mitur.

Njëri nga të dyshuari është arrestuar dhe i njëjti gjatë intervistimit ka pranuar se ka qenë me vajzën e mitur, ndërsa i dyshuari tjetër nuk është paraqitur ende në stacion policor.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Dhunim’