E dhimbshme: Ky është burri që vdiq tragjikisht pasi ra në ashensorin e banesës në Prishtinë
Një ngjarje tragjike ndodhi sot në rrugën ‘Isa Boletini’ në lagjen Dardania në Prishtinë, ku një person ka humbur jetën në rrethana të dyshimta. Viktima u gjet pa shenja jete pasi dyshohet se ra në ashensorin e banesës, raporton Gazeta Sinjali.
Rastin e ka konfirmuar edhe Policia e Kosovës, të cilët thanë për Sinjalin se viktima është 54-vjeçar, teksa po kryhen ekzaminimet e nevojshme që ndihmojnë në zbardhjen e rrethanave të rastit.
Burimet brenda Emergjencës kanë bërë me dije për Sinjalin se 54-vjeçari që humbi jetën është Sokol Ukperaj.
Nga Policia po ashtu njoftuan se trupi i pajetë i viktimës është dërguar në IML për obduksion dhe me urdhër të prokurorit, rasti është cilësuar ‘Hetim i vdekjes’.
“Sot në stacionin policor jugu në Prishtinë, është iniciuar një rast hetim mbi vdekjen, ku viktimë është një person mashkull, 54 vjeç. Vdekjen e tij e ka konstatuar ekipi mjekësor në vendngjarje.
Aktualisht policia në koordinim me prokurorinë, po ndërmarrin të gjitha veprimet e duhura hetimore dhe ato forenzike – të ekzaminimit, që do të ndihmonin hetimin e ngjarjes si dhe sqarimin dhe ndriçimin e plotë të rastit, ndërkohë që trupi i pajetë i viktimës është dërguar për obduksion”, tha për Sinjalin zëdhënësja e Policisë për Rajonin e Prishtinës, Flora Ahmeti.
