Ky është i dyshuari që e goditi për vdekje këmbësorin në Pejë dhe iku, ndodhet akoma në arrati
I dyshuari që e shkaktoi aksidentin me fatalitet në Pejë, ku e goditi për vdekje një këmbësor dhe iku nga vendi i ngjarjes akoma nuk është kapur nga Policia. Sinjali mëson se i njëjti tashmë është identifikuar dhe njësitet policore janë në ndjekje të tij.
Gazeta Sinjali ka mësuar ekskluzivisht se i dyshuari për këtë rast është Aaron Rexhaj, 24-vjeçar.
Sipas informacioneve që posedon Sinjali, Rexhaj ka të kaluar kriminale dhe njihet me nofkën “Kinezi”.
Si pasojë e aksidentit që shkaktoi Rexhaj, vdiq 41-vjeçari Shpejtim Gashi pasi nuk mundi t’iu bëjë ballë plagëve nga goditja e veturës.
Lidhur me rastin janë deklaruar edhe nga Policia Rajonale në Pejë, me ç’rast është bërë e ditur se trupi i pajetë është dërguar në IML për obduksion.
“Me datë 26. 11. 2023 rreth orës 00:47 kemi pranuar informatën se në rrugën Bill Klinton në Pejë, ka ndodhur një aksident trafiku me pasoja fatale. Në këtë aksident kanë qenë të përfshirë, një këmbësor dhe një veturë e cila ka ikur nga vendi i ngjarjes. Si pasojë e aksidentit lëndime të rënda trupore ka pësuar këmbësori i cili nuk ka arrite të përballoji plagët dhe i njëjti ka ndërruar jetë. Vdekjen e tij e ka konstatuar mjeku kujdestarë”, thuhet në njoftimin e PK-së.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
