Hallakamë në një familje në Istog, vëllai e bën për spital motrën e tij – arrestohet pas dy javësh në arrati
Rastet e dhunës në familje sa vijnë e shtohen çdo ditë e më shumë në vendin tonë. Zakonisht viktima janë gratë të cilat përjetojnë dhunë psikike e fizike kryesisht nga familjarët e tyre, të cilët pa hezitim i rrahin ato, raporton Gazeta Sinjali.
Ndihmën e Policisë së Kosovës e ka kërkuar së fundi edhe një vajzë nga fshati Muzhevinë e Istogut, e cila ka denoncuar vëllain e saj për dhunë.
Burimet brenda Prokurorisë kanë zbardhur për Sinjalin detaje nga dëshmia e vajzës, e cila ka deklaruar se vëllai i saj pas një konflikti verbal e ka goditur me boks, duke i shkaktuar lëndime trupore.
Viktima ka marrë edhe tretman mjekësor, ndërsa i dyshuari menjëherë pas kryerjes së veprës është larguar për në drejtim të panjohur.
Si rezultat i denoncimit, njësitë policore kanë marrë të gjitha veprimet e nevojshme hetimore dhe kanë arritur që pas dy javësh në arrati, të lokalizojnë vendndodhjen e të dyshuarit.
31-vjeçari është arrestuar dhe është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Dhunë në familje’.
