“Prostitutë je, kam me t’vra”, prizrenasi kërcënon gruan dhe i kërkon të largohet nga shtëpia
Dhuna në familje vazhdon të mbetet një nga damkat më të mëdha të shoqërisë kosovare. Çdo ditë në Polici raportohen raste të grave që përjetojnë dhunë në forma të ndryshme nga personat të cilët i kanë zgjedhur të ndajnë jetën me ta, por edhe nga anëtarët tjerë të familjes, raporton Gazeta Sinjali.
Ndihmën e Policisë e ka kërkuar gjatë ditës së djeshme edhe një grua nga Prizreni, e cila e ka raportuar bashkëshortin e saj me të cilin është e martuar që 23 vjet.
Burimet nga Prokuroria kanë bërë me dije për Sinjalin se viktima ka deklaruar se burri i saj në vazhdimësi ka ushtruar dhunë psikike, por në rastin e fundit për të mos mbaruar me kaq, edhe e ka kërcënuar seriozisht.
Sipas informacioneve të para, i dyshuari i ka kërkuar gruas që të largohet nga shtëpia, duke i thënë “prostitutë je, kurvë je, kam me t’vra”, thonë tutje burimet.
Përballë kësaj situate, e shqetësuar dhe frikësuar se mund t’i ndodhë diçka më e keqe, viktima ka kërkuar ndihmën e Policisë.
Si rezultat i denoncimit, i dyshuari është arrestuar dhe shoqëruar në stacion policor, ku ka dhënë dëshminë e tij lidhur me veprën me të cilën ngarkohet.
Pas përfundimit të procedurave policore, Prokurori i Shtetit ka urdhëruar masën e ndalimit ndaj të dyshuarit dhe inicimin e rastit për veprën penale “Kanosje”.
