85-vjçari në Prishtinë se lë rehat ish-bashkëshorten e tij, e kërcënon vazhdimisht
Ka shumë raste kur gratë kosovare nuk ‘shpëtojnë’ nga problemet edhe pse zgjedhin që të shkurorëzohen e të ndajnë rrugët me bashkëshortët e tyre, të cilët u shkaktojnë telashe. Edhe pas ndarjes, shumë nga ta nuk i lënë rehat ish-partneret e tyre, raporton Gazeta Sinjali.
Për një rast të tillë që ka ndodhur së fundi në rrugën ‘Muharrem Fejza’ në Prishtinë, Prokuroria ka nisur hetimet.
Sinjali mëson se një 85-vjeçar për një muaj rresht ka shqetësuar dhe ka kërcënuar ish-bashkëshorten e tij.
48-vjeçarja si zgjidhje ka parë që të denoncojë rastin në Polici, ku para hetuesve ka rrëfyer në detaje gjithë ngjarjen.
Si rezultat i denoncimit, i dyshuari është arrestuar dhe është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që ndaj të moshuarit të nisin hetimet nën dyshimet për kryerjen e veprës penale “Dhunë në familje”.
